من المسئول على معاناة هذه الاسرة .

هذه قصة حقيقية كتبتها الاخت الأكبر  لصدقيتها .
ففيها رساله لكل أب معارض لقيادة السيارة للمرأه . قد تكون أب لمثل هذه الاسره والأعمار بيد الله . هل يرضيك أن تتركهم هكذا للمجهول ؟
إقرأ اذا كان لك قلب يشعر وعقل يتدبر.

ملاحظة : القصة نشرت كما كتبتها الإخت الأكبر لصديقتها روان

كتبت معاناتي مثل ماطلبتي مني

بس رجاء روان ماأبغى تكتبين اسمي او أي معلومه عني الناس ماترحم ضعفنا ولاتحس بمعاناتنا أبدأ : أنا مواطنه توفى ابوي قبل سنوات وترك لي مسؤولية أمي وست من أخواتيانا أكبر وحده فيهممع وفاة ابويا الله يرحمه فقدنا كل شي الأمان الحمايه أقدر أقول فقدنا الكرامهبعد وفاته واجهتنا صعوبات كثيره وراح احاول أختصرها لعلها توصل لقلوب الناس صار عندي مشكلة مراجعة الأماكن الحكوميه وكيف أقدر أوصل لها مشكلة تسديد الفواتير وغيرهاطبعا أنا كملت دراستي بالجامعه وبقى له ثلاث سنوات واتخرج بإذن الله والله يقدرني واخلي كل أخواتي يكملون لأن هذا أقل شي أقدر أكافئ فيه أمي وأريح فيه أبوي بقبره طبعا أنا اشتغلت عشان أعز أهلي أشتغلت بشهادتي الثانويه وأحاول أني أسد كل حاجات أهلي والحمدلله ربي موفقني ومايزيدني الا قوه الحين بتكلم عن المشكله اللي حلها سهل بس للأسف وجدنا من هو عظمه بالبلعوم واللي يبكي أذا كان من يسلب منك حقك هو من بنات جنسك المواصلات مشكله مالقيت لها حل من وفاة ابويا الله يرحمه طبعا ماعندي الا خال واحد وفي منطقه غير المنطقه اللي أحنا فيها  وأبوي كان وحيد بين عماتي  أزواج عماتي أكيد مو مكلفين عنا لاهين بأمور أولادهم وكل واحد نفسه وأهله أهم يعني لا خال ولاعم مالنا الا التاكسي وفعلا لجأت لهذا الحل المر للأسف بدأت مشكله ثانيه خوف أمي وقلقها علينا لكن ما ألومها خوفها ماجا من فراغ المجتمع حولنا مايرحم شفنا المضره من القريب قبل البعيد كانت كل يوم تصر تجي معانا وتوصلنا كلنا وين يكفينا التاكسي وحنا سبع بنات وأمي معانا لكن وش أقول الشكوى لغير الله مذله والله مذله .......
 بيتنا بالمعذر ومدارسنا بالعليا وبعضنا في المربع وكم مشوار روحه ورجعه وهات سحب من راتبي اللي يلا يكفي أشياء ضروريه وكله يروح على الروحه والجيه عالمدراس وأذا جا وقت طلعتنا برضوا تجي أمي بتاكسي وتمر على كل المدارس والله تدخل مشوارينا بحدود مية ريال يوميايجي نص الشهر وأنا أحاول أسد العجز اللي صاير وهات ياسلفيات على ظهري وانذل لفان وعلان تخرجت وجت المعاناة الثانيه وين المعذر ووين الجامعه فكرت اتركها وأتفرغ وأخلي أخواتي يكملون المشوار بس ليه أجلس بذل شهادة الثانوي بذنب انا ما لي أي يد فيه وخلاص أمي كبرت مو حمل هذي المشواير كل يوم والله أصعب شعور يمكن تحسه العجز وقلة الحيله فكرت اني أشوف سواق لأي أحد أعرفه يوصلنا عشان أخفف من مصاريف التاكسي وأمي ترتاح شوي وفعلا لقيته وهنا المصيبه طلب على هالمشواير ١٦٠٠ قلت ماعليه راتبي على كم سلفيه والوضع بيمشي المهم أهيئ لهم حياه كريمه طبعا السواق يشتغل عندغيري وكان الاتفاق انه يودينا ويجيبنا وحنا نحاسبه نهاية كل شهرصرت ارجع من الكليه بتاكسي وأيام أوصل البيت وألقى أمي تبكي خواتي باقي مارجعوا  أروح بسرعه للمدرسه وأنا عقلي فيه ألف فكره وفكره يمكن يكون صدم أو يمكن خطفهم ولا سوى فيهم أي شي أذا وصلت ألقاهم واقفين بعز الحر ينتظرون ليه ماجاهم ماأدري أجي وأكلمه يقول موب فاضي  وأحمدي ربك أه يالزمن السواق عنده كرامه أكثر مني أسكت لأن الحاجه مذله الجيران عندهم ولد قالوا لي خليه يوصلك بس في ناس خوفوني أذا مسكت أخواتي الهيئه يعتبرون بخلوه أجل مالي إلا ذل يالتكاسي يا ذل السواق طيب ايش أسوي وكل مالها الدنيا تغلى أكثر وأكثرو أنا بذمتي أيتام أيش أأكلهم أتوقع بيجي وقت ناكل فيه تراب أنا أولى بكل ريال أهلي أولى ياناس حسوا أنا خلاص مت ديون ومذله انذل للصغير قبل الكبير الناس ماتركتني بحالي انا أشتغل بمدينة العاب نسائيه أرجع البيت متأخر الناس كل شغلها تطلع عني كلام عرضي صار علك بحلوقهم 

لو سمعت لكلام الناس من وين باكل أنا وأهلي من وين بوديهم مستشفيات وغيره

اللي يموتني ألف مره أن أبوي ترك لنا ثروه ايه والله ثروته ترك لنا سيارته اللي يحرق قلبي كل ماأشوفها عند باب البيت والله شي يحرق قلبي الشي اللي بيحل لي مشاكل كثيره ماأقدر أستخدمها طبعا أبوي توفى قبل مايكمل أقساط السياره كان حلمه انه يكون عنده هالسياره بعد ماتوفى حاولت أحقق له هالحلم وسددت اللي بقى من أقساطها ورب العزه واللي بسط الارض ماأبيعها مهما بلغت فيني الظروف هذا حلم تاج راسي اللي سرقه الموت قبل يتهنى حتى فيها سبحان الله الدنيا زائله قبل فتره كانوا شباب الحي يلعبون كسروا علي الزجاج الأمامي والله بكيت قهر وتسلفت قيمته وصلحته وكل يوم أطلع وأشوفها وأتمنى لو أقدر أعز أهلي فيها لو سقتها وقبضوا علي وش بيسوون أمي وخواتي وان تركتها من يعزني ويرحم ضعفي وقلة حيلتي ياناس ياللي واقفين بطريقنا حسوا فينا وبمعاناتنا يعني حنا وش نسوي نموت عشان ترتاحوا طيب هذا ابتلاء من رب العباد والحمد لله ليه تزيدوا علينا بالله عليكم وحده مثلي وش تبي من السواقه غير انها تحفظ ماتبقى من كرامه ياناس ارحموني الديون أكلتني مو قادره اسوي شي والله أتمنى لو يكون عندي حتى لو أخ معاق وجوده يمكن يخلي الناس ترحمني لان عندي ظهر وسند ياشباب السعوديه اعتبروني أختكم ساعدوني لاتوقفون بطريقي وطريق غيري كثيرأنا محتاجه للشباب اللي يخاف علي مو الشباب اللي يستغل ضعفي بأبشع الطرق أنا أصرف على أسره ياناس وين قلوبكم سيارة أبوي عند الباب أشوفها وماأطولها ورب الكعبه مابقى حل إلا ولجأت له أتذلل لكل حتى نسيت اني انسانه يالمعارضين مارح تحسون بلوعة فقد الأب بالذات أذا كنتوا حريم لاحول لكم ولاقوه أنا ماأطلب شي مستحيل أنا اطلب أعز نفسي أقلها يجي أخر الشهر وانا عندي اللي اجيب فيه اساسيات الحياه .
 روان أشكر لك أهتمامك بموضوعي ومساعدتيكتبت لك من ايميل المديره عندنا واعذريني حاولت أختصر لان وقت بريك الصلاه قصير . 
وادعيلي 
 حسبي الله ونعم الوكيل يارب أذلوني عبادك فكدت اشعر انني لا أملك حتى حق الكلام يارب أسألك وانت من اسميت نفسك العزيز الشكوى لغيرك مذله وما أذلني وأنا أكتب لعبيدك 
يارب ساعدني يارب . 
 روان اشكري لي بنات الحمله قولي لهم أسألهم بمالك الملك انهم يساعدونا والله أذلتنا الحاجه



شكر لك أختي المخلصه روان

إنتهت القصة

دعواتكم لها بالفرج